ប្រធានប្រតិបត្តិ

លោក អ៊ុល​ វ៉ាន់ បំពេញតួនាទីជា ប្រធានប្រតិបត្តិនៃសមាគមបណ្តាញយុវជនកម្ពុជា។ គាត់បានចូលជាសមាជិករបស់ ប.យ.ក តាំងពីឆ្នាំ២០១១ មកម្លេះ។ នៅក្នុងឆ្នាំ២០១៥ លោកត្រូវបានជ្រើសរើសឱ្យចូលបំពេញតួនាទីក្នុង ប.យ.ក ជាមន្ត្រីគម្រោង ហើយត្រូវបានស្ថាបនតំឡើងតួនាទីជា មន្ត្រីសម្របសម្រួលគម្រោងក្នុងឆ្នាំ២០១៨។ លោកត្រូវបានសមាជិកបោះឆ្នោតជ្រើសរើសជាប្រធានប្រតិបត្តិការរបស់សមាគមបណ្តាញយុវជនកម្ពុជានៅថ្ងៃទី១៥ ខែធ្នូ ឆ្នាំ២០១៩។ លោកបានបញ្ចប់បរិញ្ញាបត្រផ្នែកបង្រៀនភាសាអង់គ្លេសជាភាសាបរទេស (BTEFL) ផងដែរ ជាមួយនឹងបទពិសោធន៍០៧ឆ្នាំ ក្នុងការបង្រៀនភាសាអង់គ្លេស, ការកសាងសមត្ថភាពយុវជន, ការគ្រប់គ្រងគម្រោង, បច្ចេកវិទ្យា និងទូរគមនាគមន៍, និងការបណ្តុះបណ្តាលផ្នែក សុវត្ថិភាពលើប្រព័ន្ធឌីជីថលផងដែរ។

ប្រធានផ្នែកប្រតិបត្តិការ

អ្នកស្រី ណយ រតនា បំពេញតួនាទីជា ប្រធានផ្នែកប្រតិបត្តិនៃសមាគមបណ្តាញយុវជនកម្ពុជា។ អ្នកស្រីបានចូលបម្រើការជាបុគ្គលិករបស់ ប.យ.ក ចាប់ពីថ្ងៃទី០១​ ខែកក្កដា ឆ្នាំ២០១៩។ អ្នកស្រីទទួលខុសត្រូវជាប្រធានផ្នែកប្រតិបត្តិទូទៅនៅក្នុងស្ថាបន និងដើរតួរជាអ្នកគ្រប់គ្រងហិរញ្ញវត្ថុផងដែរ។ អ្នកស្រីមានបទពិសោធន៍ ៤ឆ្នាំកន្លះ ធ្វើការជាមួយក្រុមហ៊ុនក្នុងប្រទេសកម្ពុជា ជាមន្ត្រីគណនេយ្យ និងហិរញ្ញវត្ថុ។ អ្នកស្រីបានបញ្ចប់ថ្នាក់បរិញ្ញាបត្រ​ នៅសាកលវិទ្យាល័យមេគង្គកម្ពុជា លើមុខជំនាញ គណនេយ្យ។ ទោះបីនេះជាមុខតំណែងថ្មីសម្រាប់អ្នកស្រីក៍ដោយ ប៉ុន្តែអ្នកស្រី សប្បាយចិត្ត និងមានឆន្ទៈក្នុងការរៀនសូត្រ និងប្តេជ្ញាក្នុងការជួយស្ថាបនឱ្យរីកចម្រើនបន្ថែមទៀត។

ប្រធានផ្នែកកម្មវិធីស្រាវជ្រាវ និងតស៊ូមតិ

លោក ហេង គឹមហុង បំពេញតួនាទីជាប្រធានផ្នែកកម្មវិធីស្រាវជ្រាវ និងតស៊ូមតិនៃបណ្តាញយុវជនកម្ពុជា។ លោក​បាន​ចូលរួមបំពេញ​ការងារ​ជាមួយ​សង្គម​ស៊ីវិល ​ក្នុង​ប្រទេស​កម្ពុជា​ចាប់តាំងពីឆ្នាំ២០១៥។ លោកបានបញ្ចប់ការសិក្សា​ថ្នាក់​អនុបណ្ឌិតផ្នែក​ច្បាប់ ព្រមទាំងជាអ្នកនិពន្ធឯករាជ្យ។ ពីឆ្នាំ ២០១៥ ដល់ ឆ្នាំ២០២០ លោកបានបំពេញការងារលើវិស័យអភិបាលកិច្ចល្អ, សុខភាពសាធារណៈ និងការចូលរួមរបស់ប្រជាពលរដ្ឋនៅ មជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ហៅកាត់ថា ភីឌីភី។ លោកចាប់ផ្តើមបំពេញការងារជាមួយសមាគមបណ្តាញយុវជនកម្ពុជា នៅដើមឆ្នាំ ២០២១ ដោយទទួលខុសត្រូវលើការអភិវឌ្ឍន៍សមត្ថភាព និងការផ្តល់សិទ្ធិអំណាចរបស់យុវជន ការបង្កើតយុទ្ធសាស្រ្តសម្រាប់គម្រោងនិងជាអ្នកដឹកនាំយុទ្ធនាការតស៊ូមតិរបស់យុវជន ការផលិតទិន្នន័យការវាយតម្លៃ និងតាមដានរបស់គម្រោង ដឹកនាំ និងសម្របសម្រួលការស្រាវជ្រាវ និងការតស៊ូមតិ ការអភិវឌ្ឍន៍ និងគ្រប់គ្រងការរ៉ៃអង្គាសថវិកាសម្រាប់សមាគមផងដែរ។

ប្រធានផ្នែកចងក្រង និងពង្រឹងសិទ្ធិអំណាចយុវជន

ម៉ើ ចាន់ដារ៉ា គឺជាអ្នកធ្វើការងារសង្គម និងអនុវត្តសិទ្ធិវ័យក្មេង ដែលមានបទពិសោធន៍ជាច្រើនឆ្នាំទៅលើការធ្វើការងារជាមួយសហគមន៍ និងយុវជន ដើម្បីធ្វើការគាំទ្រ និងលើកកម្ពស់យុវជន និងសហគមន៍ ក្នុងភាពជាមេដឹកនាំ ការផ្តល់ធាតុចូលសម្រាប់ការធ្វើផែនការយុទ្ធសាស្រ្ត ការកសាងធនធានមនុស្ស និងជាពិសេសទៅលើបញ្ហាសិទ្ធិមនុស្ស និងកិច្ចការពារបរិស្ថាន។ លោកក៏បានដើរតួនាទីយ៉ាងសំខាន់ ក្នុងការជួយស្ថាបនលើការរៃអង្គាសថវិការ បច្ចេកទេសការគ្រប់គ្រង ត្រួតពិនិត្យ និងវាយតម្លៃគម្រោង ការសរសេររបាយការណ៍ទៅកាន់ម្ចាស់ជំនួយ ការកសាងសមត្ថភាពបុគ្គលិក និងការគាំទ្រនូវបច្ចេកទេសផ្សេងៗទៀតផងដែរ ជាពិសេសទៅលើការចងក្រង និងពង្រឹងសិទ្ធិអំណាចរបស់យុវជន។ លោកជឿជាក់យ៉ាងមុតមាំថា តាមរយៈបទពិសោធន៍ ចំណេះ និងជំនាញដែលមាន លោកនឹងយកទៅប្រើប្រាស់សម្រាប់ចូលរួមជាវិភាគទានសម្រាប់រកយុត្តិធម៌ជូនជនរងគ្រោះ និងដើម្បីចូលរួមទាមទារយុត្តិធម៌សង្គមផងដែរ។